|
Hydref 2008
Rydym wedi cael wythnosau reit brysur ers i’r Senedd ddychwelyd dechrau mis Hydref, ac fel meinciwr cefn rwyf wedi sicrhau bod yna gyfleoedd pwysig ar gael i drafod materion a godwyd gan drigolion ledled Ceredigion yn y Senedd.
Mewn trafodaeth a ddechreuais ac a arweiniais, cefais gyfle i godi’r mater o dagio defaid yn electronig. Fel rheol, dim ond yr Aelod a’r Gweinidog sy’n cymryd rhan mewn trafodaethau hanner awr fel hon, ond yn y drafodaeth hon defnyddiais ymyriadau yn fy araith gan fy nghyd-aelodau Llafur, Ceidwadwyr a Chenedlaetholwyr a gwelwyd bod nifer ledled y sbectrwm gwleidyddol yn anghytuno â’r cynllun. Pam ddylen ni fynd ymlaen â chynllun adnabod biwrocrataidd sydd â thechnoleg amheus, a fydd yn rhoi dyfodol nifer o ffermydd teulu a martau yn y fantol, am ei fod mor ddrud? Mae’r Llywodraeth wedi gweld yr anawsterau ond nid yw wedi llwyddo i berswadio’r Comisiwn Ewropeaidd i gael gwared â’r cynllun. Oherwydd hyn, rwyf wedi cysylltu â holl Aelodau Senedd Ewrop y DU yn erfyn arnynt i arwyddo Datganiad Senedd sy’n dangos eu gwrthwynebiad tuag at gynigion anetholedig y Comisiwn.
Yn ystod ein Hawl i Holi Cymru gyntaf ers y gwyliau, cefais gyfle i holi Gweinidog newydd Cymru, Wayne David AS, am y rheilffordd rhwng Aberystwyth a’r Amwythig, ac yn benodol y gwasanaeth bob awr. Mae’n ymddangos nad yw’r fargen hon wedi’i selio. Dywedodd Passenger Focus wrthyf fod y gwaith ar y lein wedi cael ei ohirio, ac maent yn parhau i aros am ateb gan y Cynulliad ynglŷn â chael mwy o arian. Felly croeswch eich bysedd! Fodd bynnag, rwy’n croesawu’r newyddion y bydd nifer o’n gwasanaethau yn terfynu ym Mirmingham International yn hytrach na’r Birmingham New Street erchyll neu Wolverhampton.
Mewn trafodaeth a gafwyd yn y Senedd wythnos diwethaf ynglŷn â’r anawsterau ariannol y mae pensiynwyr yn eu hwynebu, cefais gyfle i godi’r ffaith fod chwyddiant pensiynwyr yn uwch na’r cynnydd mewn prisiau adwerthu - amcangyfrifir ei fod cymaint â 9% yn uwch. Y rheswm dros hyn yw bod pensiynwyr yn gwario mwy o’u hincymau sefydlog ar fwyd a thanwydd. Erfyniais ar y Gweinidog i lobïo ei chydweithwyr yn y Drysorlys i gynyddu Pensiwn y Wladwriaeth fel bod y cyfraddau’n debycach, er byddai’n well gennyf ei weld yn cael ei gysylltu ag incwm.
Yn dilyn gosodiadau a wnaed i mi gan y Lleng Prydeinig, cefais gyfle i drafod eu ‘Hymgyrch Dychwelyd i Ddogni’. Mae’n amlygu’r ffaith fod dros hanner ein pensiynwyr wedi gwneud gwasanaeth cenedlaethol neu yn gyn-filwyr ac mae gan 38% o’r rhain incymau sy’n is na’r lleiafswm sydd angen i fyw’n iach - £136 yr wythnos i bob pensiynwr. Yr hyn a oedd yn frawychus yn ei harolwg oedd nad oedd tua 71% o’r rhai a atebodd yn hawlio budd-dal Treth Cyngor, er bod bron hanner ohonynt yn cael anhawster i dalu’r Treth Cyngor.
Yn ogystal â hyn, rwyf wedi gofyn mewn trafodaethau yn Neuadd San Steffan i ddifa’r gofyniad sydd ar fusnesau bach i dalu trethi busnes ar adeiladau busnes sy’n wag am fwy na’r cyfnod gwyliau o dri mis, ac mewn trafodaeth ynglŷn â throsglwyddo i ddigidol, erfyniais arnynt i helpu’r cartrefi hynny a fydd heb lun teledu o gwbl pan fydd analog yn cael ei ddiffodd. Dylai trosglwyddo i ddigidol alluogi mwy ac nid llai o bobl i wylio’r teledu.
Un o’r digwyddiadau lleol ardderchog rwyf am dynnu sylw ato’r mis hwn yw lansiad Iechyd a Lles MIND yn Dan Dre, Aberystwyth. Mae’n cynnig pecyn cyfannol o help a chyngor i’r rheiny sydd angen cefnogaeth - yn arbennig yn y cyfnod anodd hwn. Cefais hefyd y fraint o gymryd rhan mewn digwyddiad dydd Sadwrn diwethaf a oedd yn dathlu Gwaith Ieuenctid y sectorau gwirfoddol ledled Ceredigion, gan gwrdd â gweithwyr ieuenctid ymroddedig a’u grwpiau. Dylai eu brwdfrydedd fod yn gysur i ni i gyd - yn rhoi rhywbeth yn ôl i’r gymuned mewn ffyrdd a fydd yn elwa’r gymuned gyfan.
| |
